Shaqiri:Ende ka shkolla që nuk lejojnë mësimin në gjuhën shqipe!

December 13, 2023

Read Time:1 Minute, 24 Second

Ministri i Arsimit, Jeton Shaqiri, e ka quajtur të papranueshme udhëtimin e nxënësve nga një Komunë në tjetër, për të zhvilluar procesin mësimor, përcjell KlanM.

I pyetur nga gazetarët Ministri Shaqiri ka sqaruar se përse nuk ishte pranuar propozimi i Këshillit të Prindërve të Komunës Çashkë në takimin e djeshëm.

“Cdo propozim, pa marrë parasysh nëse ka të bëjë me kompetencat e drejtores, thash se duhet të ketë bazë ligjore për cdo problem. Paralelja e hapur, bëhet fjalë për katër nxënës, fëmijë të vegjël që nuk dinë as për parti politike, as për dallimet mes nesh. Kërkova që deri në fund të vitit shkollor ose deri në gjetjen e zgjidhjes, ta vazhdojnë mësimin në shkollën e njëjtë”, deklaroi Jeton Shaqiri.

Ministri Shaqiri është zotuar se do të kërkojë zgjidhje, që nuk do të kuptohet si cështje politike, pasi në Komunën e Çashkës, koalicionojnë, LSDM-BDI, njëjtë sikurse në nivel qendror.

Gjatë takimit me Këshillin e Prindërve të Komunës Çashkë të Velesit, ai ka propozuar, që nëse dëshirojnë prindërit, të hapet paralele me re me mësim në gjuhën maqedone në fshatin Jabollçisht.

“Nëse japin propozim se fëmijët kanë të drejtë të mësojnë në gjuhëna amtare, do ta pranoj. U thash se nëse dëshironi dhe kërkoni të hapet paralele maqedonase në Jabollçisht të Epërm apo të Poshtëm, nuk është problem. Në vend që të flasim për integrimin ndëretnik, tek ne ka shkolla që nuk lejojnë të drejtën kushtetuese për fëmijët”, tha Shaqiri.

Ndryshe, prindërit e nxënësve maqedonas, kundërshtojnë t`i dërgojnë fëmijët në shkollën fillore të Çashkës, por edhe kanë bllokuar punën e mësimdhënësve.

Sipas mësimdhënësve shqiptarë të kësaj Komune, realisht prindërit nuk janë kundër drejtores, por kundër paraleles në gjuhën shqipe.