Dita e dytë e Samitit të BE-së në Bruksel, do të diskutohet metodologjia e re e zgjerimit dhe situata në Lindjen e Mesme

Read Time:3 Minute, 39 Second

Krerët e shteteve apo qeverive të vendeve anëtare të BE-së vazhdojnë sot Samitin dyditor të Unionit, në kuadër të të cilit dje morën vendim për fillimin e negociatave të anëtarësimit me Ukrainën dhe Moldavinë, si dhe i dhanë statusin kandidat Gjeorgjisë, ndërsa për Bosnjë dhe Hercegovinën u vendos të mbetet rekomandim i kushtëzuar për fillimin e negociatave të anëtarësimit, transmeton Portalb.mk.

“Këshilli Evropian ka vendosur të hapë negociatat e anëtarësimit me Ukrainën dhe Moldavinë, njoftoi dje presidenti i Këshillit Evropian”, Charles Michel.

Sipas tij, Këshilli i BE-së vendosi t’i japë Gjeorgjisë statusin e vendit kandidat për anëtarësim, ndërsa rekomandimi i kushtëzuar për fillimin e negociatave mbetet në raport me BeH.

“BE do të hapë negociatat me Bosnjën dhe Hercegovinën, pasi të arrihet shkalla e nevojshme e përputhshmërisë me kriteret e anëtarësimit dhe i bën thirrje Komisionit që të paraqesë një raport deri në mars për të marrë një vendim të tillë”, tha Michel, duke theksuar se vendimet e tilla janë një sinjal i qartë për shpresë për popujt e këtyre vendeve dhe për kontinentin evropian.

Këto vendime janë marrë në kuadër të debatit për zgjerimin e BE-së, në kuadër të të cilit janë miratuar edhe konkluzionet për procesin, duke treguar se Bashkimi Evropian është i gatshëm të përfundojë fazën e hapjes së negociatave për anëtarësim me Maqedoninë e Veriut, sapo vendi të ketë zbatuar zotimin e tij për miratimin e ndryshimeve kushtetuese, në përputhje me procedurat e brendshme të saj, siç thuhet në vendimet e Këshillit të BE-së të datës 18 korrik 2022.

Këshilli Evropian i bën thirrje Maqedonisë së Veriut që të përshpejtojë përfundimin e këtyre ndryshimeve, thuhet në dokument.

Duke konfirmuar përkushtimin e tyre të plotë dhe të qartë për perspektivën e anëtarësimit të vendeve të Ballkanit Perëndimor në Bashkim, liderët e BE-së bëjnë thirrje edhe për përshpejtimin e procesit të anëtarësimit të tyre në bllok.

Këshilli Evropian vuri në dukje letrën e Komisionit për Planin e ri të Rritjes për Ballkanin Perëndimor, i cili synon të përshpejtojë lidhjen socio-ekonomike midis Ballkanit Perëndimor dhe Bashkimit Evropian në bazë të kushteve strikte dhe inkurajon rajonin të përshpejtojë Konkluzioneve i shtohet ritmi i reformave në lidhje me BE-në dhe për të nxitur integrimin ekonomik rajonal nëpërmjet një tregu të përbashkët rajonal, bazuar në rregullat dhe standardet e BE-së.

Dokumenti thekson gjithashtu se Këshilli Evropian mbetet i përkushtuar për të promovuar integrimin gradual midis BE-së dhe rajonit gjatë vetë procesit të zgjerimit në një mënyrë të kthyeshme dhe të bazuar në merita.

“Këshilli Evropian nënvizon se zgjerimi është një investim gjeostrategjik në paqe, siguri, stabilitet dhe prosperitet. Ai është një shtytës për përmirësimin e kushteve ekonomike dhe sociale të qytetarëve evropianë, për reduktimin e dallimeve midis vendeve dhe duhet të inkurajojë vlerat mbi të cilat u themelua Bashkimi. Duke parë perspektivën e një Unioni të mëtejshëm të zgjeruar, si Shtetet Anëtare të ardhshme ashtu edhe BE-ja duhet të jenë gati në kohën e anëtarësimit. Puna në të dyja binarët duhet të ecë paralelisht. Kandidatët për anëtarësim duhet të shtojnë përpjekjet e tyre për reforma, veçanërisht në fushën e sundimit të ligjit, në përputhje me natyrën e bazuar në merita të procesit të pranimit dhe me ndihmën e BE-së”, thuhet në konkluzione.

Këshilli i Ministrave për Çështjet e Përgjithshme dhe Evropiane të Bashkimit Evropian do të shqyrtojë në mbledhjen e sotme metodologjinë e re të zgjerimit.

Siç njofton korrespondenti i MIA-s nga Brukseli, sot liderët do të debatojnë për situatën në Lindjen e Mesme, ku pritet të bëhet thirrje për lirimin e të gjithë pengjeve nga Hamasi dhe për të diskutuar se si të veprohet me situatë alarmante humanitare në Gaza.

Siç deklaroi Michel në ftesën për Samitin, BE-ja duhet të riafirmojë mbështetjen e saj për “të drejtën e Izraelit për të ekzistuar dhe mbrojtur veten kundër Hamasit”, të mbrojë të drejtën ndërkombëtare dhe të drejtën ndërkombëtare humanitare.

Përveç kësaj, udhëheqësit e BE-së do të shqyrtojnë progresin në zbatimin e konkluzioneve të mëparshme të lidhura me sigurinë dhe mbrojtjen që synojnë ndërtimin e një bashkimi më të fortë gjeopolitik dhe krijimin e një tregu të brendshëm për industrinë e mbrojtjes.

Parashikohet që në Samit të diskutohet edhe për trajtimin e të gjitha formave të urrejtjes, antisemitizmit, intolerancës, racizmit dhe ksenofobisë, përfshirë manifestimet anti-islame, si çështje specifike që lidhen me politikën e jashtme të Bashkimit.