Në Tetovë sanksionohen 17 këmbësorë

Punonjësit policorë të SPB-Tetovë të enjten nga ora 10.00 deri në ora 14.00 kanë kryer aksion kontrollues ndaj këmbësorëve dhe sjelljes së tyre në komunikacion. Gjatë kontrollit janë zbuluar dhe sanksionuar gjithsej 17 shkelje numri më i madh i shkeljeve kishte të bëjë me kalimin e rrugëve jashtë vendkalimeve të shënuara për këmbësorë dhe 4 për mosrespektimin e sinjalizimit vertikal-semaforët për këmbësorë.

Për të gjithë këmbësorët-shkelës janë përgatitur parashtresa përkatëse me gjoba në të holla nga 35 deri në 50 euro në kundërvlerë në denarë, si dhe ftesa për pjesëmarrje në të ashtuquajturin mësim në komunikacion. Gjatë kontrollit janë sanksionuar edhe 2 lloje të tjera kundërvajtjesh në trafik.

Sektori për Punë të Brendshme-Tetovë edhe një herë apelon këmbësorët që të respektojnë plotësisht shenjat, rregullat dhe rregulloret e komunikacionit dhe të mos kalojnë rrugët ku arrijnë, por vetëm në vendkalimet e shënuara për këtë qëllim. Gjithashtu ata këshillohen që të respektojnë sinjalistikën ndriçuese në kryqëzime dhe të lëvizin me kujdes në rrugë që nuk kanë trotuare të formësuara. Nga ana tjetër drejtuesit e mjeteve këshillohen që t’u japin gjithmonë përparësi kalimi këmbësorëve dhe të mos rrezikojnë sigurinë e tyre dhe të pjesëmarrësve në komunikacion.