Rama: Ali Ahmetit mund t’i bëhen kritika, por ajo që ka bërë për shqiptarët është leksion për brezat që vijnë
Read Time:1 Minute, 28 Second
Republika e Maqedonisë së Veriut pritet të zgjedhë ditën e nesërme, qeverinë e re teknike që do të udhëhiqet për herë të parë nga një kryeministër shqiptar, i cili është Talat Xhaferi.
Lidhur me këtë ka reaguar kryeministri Edi Rama, i cili ka bërë një mesazh vlerësimi për kreun e partisë “Bashkimi Demokratik për Integrim”, Ali Ahmeti, ku shkruan se ai ka bërë shumë për të drejtat e shqiptarëve.
“Ali Ahmetit mund t’i bëhen kritika plot brenda vendit, sepse është e drejta dhe detyra e kujtdo që është në opozitë të kërkojë më shumë nga kushdo që është në pushtet… Por çka ka bërë Ali Ahmeti me pushtetin për përparimin e të drejtave të shqiptarëve në shtetin fqinj, e për afirmimin e tyre si qytetarë të barabartë të Republikës së Maqedonisë së Veriut është një leksion historik për të gjithë ne dhe brezat që vijnë! E duke parë foton bashkëngjitur të një tjetër arritjeje historike të lidershipit të Ali Ahmetit, m’u kujtua fjala e mençur e një politikani të madh, “Djemtë e duan pushtetin për t’u njohur nga të tjerët, kurse burrat për të bërë për të tjerët”; kjo do të ishte diçiturë perfekte për këtë foto”, shkruan Rama.
Kujtojmë që të dielën Kuvendi do të zgjedh Qeverinë Teknike me kryeministër Talat Xhaferin. Mandati i saj do jetë 100 ditë, ndërsa detyra e këtij formati të organit ekzekutiv është përgatitja e vendit për zgjedhjet parlamentare të 8 majit. Roli dhe kompetencat e kryeministrit teknik i cili buroi si ide e negociatave të “Përzhinës” në vitin 2015 është i kufizuar, përkatësisht është i cunguar nga fuqia ekzekutive.
Ligji mbi Qeverinë përcakton kompetencat e organit ekzekutiv dhe të resorëve brenda saj, kryesisht të atyre që udhëhiqen nga opozita apo kanë zëvendësministra plotësues.
Happy
0 %
Sad
0 %
Excited
0 %
Sleepy
0 %
Angry
0 %
Surprise
0 %
0
0
Average Rating