Xhaferi: Kanë mbetur edhe 50 ditë deri në zgjedhje, qytetarët kanë kohë të pajisen me dokumente personale

March 6, 2024

Read Time:1 Minute, 35 Second

Kanë mbetur edhe 50 ditë deri në zgjedhje, gjatë muajit mars qytetarët mund të paraqesin kërkesë dhe të pajisen me dokumente përkatëse. Kështu tha kryeministri teknik Talat Xhaferi sot në një konferencë për media në Qeveri, duke iu përgjigjur pyetjeve të gazetarëve se si do ta ushtrojnë të drejtën e votës në zgjedhjet e ardhshme parlamentare dhe presidenciale ata që nuk kanë dokumente të vlefshme personale dhe a do ta pranojë Qeveria propozimin e Komisionit Shtetëror Zgjedhor (KSHZ) që pasaportat të vazhdojnë të jenë të vlefshme për identifikim gjatë ditës së votimit.

“Statistikat që janë treguese për punën e MPB-së thonë se nga 1 shkurti deri më 29 shkurt janë bërë gjithsej 123.983 kërkesa për dokumente udhëtimi, prej të cilave janë lëshuar 95.267 dokumente udhëtimi. Për letërnjoftime janë pranuar 82 235, letërnjoftime të lëshuara 71 410, për patentë shoferi janë 46 280 dhe janë lëshuar 39 552”, thotë kryeministri teknik.

”Me dinamikën e deritanishme të nxjerrjes së dokumenteve, ata 100 mijë persona që nuk kanë dokument, gjatë muajit mars mund të pajisen të gjithë me dokumentet përkatëse”, tha Xhaferi.

Sipas tij, prioritet duhet t’i jepet së pari të drejtës së qytetarit për të nisur një kërkesë në kohë dhe të duhur për të pasur një dokument dhe më pas, siç tha ai, është obligim i tyre që të dalin me një vendim të duhur se si do të veprojnë.

Komisioni Shtetëror i Zgjedhjeve (KSHZ) propozon që të futet një dispozitë kalimtare në Kodin Zgjedhor që do t’u mundësojë qytetarëve nga vendi dhe jashtë vendit që në zgjedhjet e ardhshmetë votojnë me pasaporta me emrin e vjetër kushtetues të cilave nuk u ka skaduar ende vlefshmëria.

Kjo dispozitë, siç tha para dhjetë ditësh kreu i KSHZ-së, Aleksandar Dashtevski,do të vlejë vetëm për zgjedhjet e sivjetshme dhe mbi të gjitha do të vlejë për qytetarët të cilët kanë letërnjoftim të pavlefshëm.