Takimi 3 orë i VLEN-it pa marrëveshje
Takimi i mbrëmshëm i krerëve të koalicionit VLEN ka përfunduar pa asnjë rezultat konkret. Arben Taravari nga Aleanca për Shqiptarët nuk mori pjesë në bisedimet që u zhvilluan mes liderëve të koalicionit, përfshirë Izet Mexhitin, Bilall Kasamin dhe Zeqirja Ibrahimin. Në tryezën e bisedimeve ishin gjithashtu deputeti i pavarur Bekim Qoku, si dhe dy përfaqësues të Aleancës për Shqiptarët: deputeti Halil Snopçe dhe zëvendëskryeministri Arben Fetai, raporton Klan Maqedoni.
Takimi, që zgjati më shumë se tre orë, nuk arriti të prodhojë asnjë dakordësi konkrete. Qëndrimet e palëve mbetën të paqarta, pasi njëra palë kërkonte informacione për ndarjen e komunave dhe listave zgjedhore, ndërsa pala tjetër kërkonte garanci të forta që Taravari nuk do të mbështeste BDI-në.
Pavarësisht bisedimeve të gjata, palët janë pajtuar vetëm për një gjë – të zhvillojnë një takim të radhës në ditët në vijim. Më herët gjatë ditës, Taravari pranoi atë që kishte mohuar deri tani: 40% të “kulaçit” të marrë, ndërkohë që kishte deklaruar se ishte informuar vetëm përmes mediave për shkrirjen e VLEN-it në një parti të vetme.
