Dauti në takimin për transparencën e partive politike: ASH, model i standardeve demokratike

Sekretarja e Përgjithshme e Aleancës për Shqiptarët, znj. Ilire Dauti, mori pjesë në takimin e organizuar nga Westminster Foundation for Democracy, ku morën pjesë sekretarët e përgjithshëm të partive politike në Maqedoninë e Veriut, njofton Flaka. Në fokus të diskutimit ishte Indeksi i Transparencës së Partive Politike (Political Party Transparency Index) dhe rëndësia e këtij instrumenti për rritjen e besueshmërisë publike ndaj subjekteve politike.

Znj. Dauti theksoi se transparenca është thelbësore për ndërtimin e integritetit politik, për komunikim të hapur me qytetarët dhe për forcimin e demokracisë së brendshme në partitë politike.

“Transparenca nuk është vetëm një standard teknik, por një vlerë politike që e ndan të kaluarën nga e ardhmja. Aleanca për Shqiptarët është angazhuar që nga themelimi të jetë shembull në këtë drejtim,” – deklaroi Dauti.

Në këtë kontekst, ajo përmendi se Aleanca për Shqiptarët është ndër partitë me nivelin më të lartë të transparencës, duke ndjekur praktika demokratike të mirëfillta dhe duke ofruar qasjen më të lehtë e efikase për komunikim publik, përfshirë edhe pjesëmarrjen e qytetarëve në formësimin e politikave.

Dauti theksoi gjithashtu faktin domethënës se Aleanca për Shqiptarët është partia e vetme që ka zgjedhur një grua në pozitën e Sekretarit të Përgjithshëm, si dëshmi konkrete e përkushtimit për barazi gjinore dhe përfshirje të gruas në vendimmarrje.

Ajo falënderoi organizatorët e takimit:

“Ky takim dhe mbështetja nga Westminster Foundation for Democracy përbëjnë një kontribut të çmuar në përpjekjet për rritjen e kapaciteteve demokratike të partive në vend. Është inkurajuese të kemi partnerë ndërkombëtarë që nxisin praktika të mira politike.”

Aleanca për Shqiptarët rithekson angazhimin e saj për të vijuar si një model i transparencës, barazisë dhe përfaqësimit qytetar, duke forcuar më tej besimin e publikut në veprimtarinë politike dhe institucionale. Flaka Media

Happy

0 0 %

Sad

0 0 %

Excited

0 0 %

Sleepy

0 0 %

Angry

0 0 %

Surprise

0 0 %