Sofja: Mbi 216 mijë pasaporta bullgare u janë lëshuar qytetarëve të Maqedonisë së Veriut

Mbi 216 mijë pasaporta me shtetësi bullgare u janë lëshuar qytetarëve të Republikës së Maqedonisë së Veriut, njoftoi Ministri i Brendshëm bullgar Daniel Mitov, raporton BGNES, transmeton Portalb.mk.

“Në periudhën nga 1 janari 2007 deri më 17 qershor 2025, u janë lëshuar 216,594 pasaporta qytetarëve bullgarë për të cilët ka informacion për një shtetësi të dytë nga Republika e Maqedonisë së Veriut”, deklaroi ministri i Brendshëm.

Në këtë drejtim, ai theksoi se baza për lëshimin e një pasaporte bullgare lind me fitimin e shtetësisë bullgare nga individët, duke pasur parasysh se sipas Ligjit për Dokumentet Personale të Bullgarisë, një pasaportë u lëshohet vetëm qytetarëve bullgarë.

Kujtojmë se raporti vjetor për veprimtarinë e Komisionit për Shtetësinë Bullgare, tregoi se gjatë vitit 2024 pothuajse 1700 qytetarë të Maqedonisë së Veriut kanë marrë pasaporta bullgare, duke vazhduar trendin e kërkimit të kushteve më të mira të jetesës në Bashkimin Evropian.

Sipas raportit, gjatë vitit të kaluar gjithsej 16.500 persona kanë marrë nënshtetësinë bullgare, që është një rritje prej 4.000 krahasuar me vitin 2023. Numri më i madh i aplikimeve ka ardhur nga Ukraina (2,400 persona), e ndjekur nga Turqia (2,200) dhe Moldavia (1,800). Maqedonia e Veriut është në vendin e katërt me gati 1700 shtetas të rinj bullgarë.

Në vitin 2020, ministrja e atëhershme bullgare e drejtësisë Desislava Ahladova, deklaroi se pothuajse 66.000 maqedonas gjatë 10 viteve të fundit, kanë marrë nënshtetësi bullgare. Në të gjitha rastet, baza për dhënien e shtetësisë është dëshmia për prejardhjen bullgare, tha ministrja e Drejtësisë , gjatë pyetjeve të deputetëve në parlamentin bullgar.

“Në të gjitha rastet, baza për dhënien e shtetësisë është dëshmia e prejardhjes bullgare”, citohet të ketë thënë ministrja Ahladova.

Nga 1 janari 2010 deri më 22 tetor 2020, kërkesë për shtetësi bullgare kanë paraqitur 77.829 shtetas maqedonas, prej tyre 77.726 ishin me origjinë bullgare. Gjatë së njëjtës periudhë, 65.675 maqedonas morën shtetësinë bullgare me dekret presidencial.

Happy

0 0 %

Sad

0 0 %

Excited

0 0 %

Sleepy

0 0 %

Angry

0 0 %

Surprise

0 0 %