Për VMRO-DPMNE, alfa dhe omega e veprimit politik, mbetet retorika nacionaliste

Read Time:2 Minute, 46 Second

“Zgjedhjet parlamentare të 8 majit do të jenë një betejë mes të shkuarës ‘heroike’, miteve… dhe një të ardhmeje tjetër – evropiane”, shkruan portali Frontline në gjuhën maqedone, përcjell PRESSonline.al

Ky është përfundimi i analistëve politikë me të cilët ka biseduar “Frontline” për situatën aktuale politike në vend dhe mungesën e një oferte konkrete opozitare në raport me ofertën konkrete europiane dhe të begatë nga partitë në pushtet.

Këto zgjedhje, sidomos në kampin maqedonas, do të jenë një betejë mes të shkuarës plot “heronj”, mite, mbrojtje të çështjes “të pastër” maqedonase… dhe një të ardhmeje tjetër apo europiane. Pra, nga njëra anë kemi VMRO-DPMNE-në, e cila është e “dehur” para kohës së saj në pushtet, e intereson se si të elektrizojë masat me retorikë nacionaliste, pa ofruar ndonjë program apo ofertë të caktuar. Por kjo çon edhe në ndarje të thella etnike, sepse nuk mund të flasësh për çështjen maqedonase në fushatë duke përjashtuar të tjerët dhe më pas, në rast fitoreje, të kërkosh një partner shqiptar në qeveri, duke harruar fushatën etnike, thotë. analisti politik Urim Saliu për Frontline.
Në anën tjetër, shton ai, kemi LSDM-në, e cila haptazi e përkrah agjendën evropiane.

“Megjithë gabimet në qeverisje, ata ende kanë një ofertë në interes të të gjithë qytetarëve”, nënvizon Saliu.

Gazetari dhe analisti politik Driton Zenku thotë se ata që e njohin politikën e VMRO-DPMNE-së që nga fillimet e saj nuk janë aspak të befasuar nga qëndrimet që kjo parti gjeneron në vazhdimësi.

Ndonjëherë të krijohet përshtypja se kjo parti udhëhiqet nga një organ mbipartiak që përcakton veprimtarinë e saj politike. Në fund të fundit, në parti ekziston një organ që quhet Unioni i Veteranëve me në krye Mane Jakovlevski. Është krijuar përshtypja se agjenda politike e VMRO-DPMNE-së buron nga ky organ i cili ka 27 anëtarë. Kreu i partisë mund të ndryshojë, por jo diskursi politik. Politika nacionaliste e VMRO-DPMNE-së është evidente dhe ky realitet nuk është diçka e re. Nëse do të ishte ndryshe, do të ishte befasuese. Për VMRO-DPMNE-në, alfa dhe omega e veprimit politik mbetet retorika nacionaliste, tha Zenku për Frontline.

Sipas tij, VMRO-DPMNE ka një qasje konsistente në fjalorin e saj politik dhe nuk shënon progres nga pikënisja e sajë politike nga viti 1990 si parti politike, dhe më herët si ideologji.

– Në fakt, rrëfimi i tyre nacionalist është i ndërthurur me anën tjetër të medaljes. Patriotët e mëdhenj që vjedhin vendin dhe popullin e tyre. Kjo parti e ka qeverisur shtetin dy herë, nga viti 1998 në 2002 dhe nga 2006 në 2017. Zero arritje në proceset integruese të shtetit, por miliona euro në xhepat e lidershipit të kësaj partie. Kujtoni aferat korruptive dhe skandalet gjatë qeverisjes së tyre nga OKTA në 1999 deri te Shkupi 2014. Grabitin në emër të patriotizmit dhe bëjnë biznes me armiqtë, siç ishte rasti i Oktës dhe investitorit grek. VMRO-DPMNE ka një model veprimi tradicional të cilin e vlerëson dhe e përdor për të mbajtur elektoratin rreth vetes, pra retorikën nacionaliste. Ka gjetur formulën e suksesit dhe nuk humb kohë për të eksperimentuar me diçka të re, theksoi Zenku.

Në anën tjetër, thekson ai, agjenda evropiane është pasuria kryesore e partive në pushtet, por VMRO-DPMNE as që u përpoq të fitojë pikë nga ky proces integrues evropian.