Dorëheqja e Damevës, BDI: Skandali në Këshillin Gjyqësor, pasqyrim i shtetit të kapur!
Read Time:2 Minute, 29 Second
Dorëheqja e kryetares së Këshillit Gjyqësor, shënon një tjetër moment dramatik që pasqyron gjendjen alarmante të kapjes së shtetit dhe rrënimin e pavarësisë së institucioneve. Sulmet personale, presionet politike dhe manipulimet publike që përshkruan zonja Dameva janë një pasqyrë e qartë e qeverisë jolegjitime dhe të papërgjegjshme, e cila nuk ndalon në përpjekjet për të shtrirë kontrollin mbi çdo segment të shtetit. Kështu ka reaguar BDI, pas dorëheqjes së kryetares së Këshillit Gjyqësor, Vesna Dameva, ndërsa lidhet me akuzat dhe kërcënimet që kryeministri Hristijan Mickoski u bën autoriteteve të gjyqësisë.
“Kjo qeveri jo vetëm që ka dështuar të garantojë një sistem të drejtë dhe të pavarur gjyqësor, por po përdor çdo mjet për të shantazhuar dhe diskredituar ata që nuk janë të gatshëm të përkulen përballë presioneve politike. Kur funksionarët e lartë të drejtësisë, të ngarkuar me mbrojtjen e ligjit dhe drejtësisë, shantazhohen publikisht, mesazhi që përcillet është i qartë: në këtë vend, pavarësia institucionale është bërë armik i qeverisë. Bashkimi Demokratik për Integrim dënon ashpër sulmet politike ndaj zonjës Dameva dhe ndërhyrjet brutale ndaj integritetit të Këshillit Gjyqësor. Sulme të tilla janë jo vetëm një sulm personal ndaj një individi, por edhe një përpjekje për të paralizuar të gjithë sistemin gjyqësor, duke minuar çdo përpjekje për reforma reale dhe drejtësi të pavarur”, thuhet në reagimin e BDI-së.
Ne, vijon më tej reagimi, u bëjmë thirrje institucioneve ndërkombëtare që të ndjekin nga afër këtë situatë dhe të reagojnë ndaj rrëshqitjes së vazhdueshme të Maqedonisë së Veriut në autoritarizëm dhe kapjen totale të shtetit.
“Është e qartë se qytetarët nuk mund të presin drejtësi nga një qeveri që sulmon institucionet e drejtësisë për përfitime politike. Kjo është një thirrje për reflektim dhe veprim. Pavarësia e gjyqësorit është shtylla e çdo demokracie dhe kapja e tij është një akt që kërcënon stabilitetin dhe të ardhmen e vendit. Bashkimi Demokratik për Integrim, do të qëndrojë gjithmonë në mbrojtje të institucioneve të pavarura dhe të drejtësisë, sepse besojmë se drejtësia e lirë dhe e paanshme është garancia e vetme për një shoqëri të drejtë dhe të barabartë”.
Ndryshe, kryetarja e Këshillit Gjyqësor, Vesna Dameva ka dhënë dorëheqjen e saj, ndërsa ka thënë se një nga arsyet e dorëheqjes së saj është presionin politik ndaj Këshillit nga partia në pushtet VMRO-DPMNE, dhe kryeministri Hristijan Mickoski.
“Kur nuk dëgjohen thirrjet për përmirësim të situatës në drejtësi, dhe kur kjo pengohet nga Qeveria në mënyra të ndryshme, kryeministri dhe politikanët nga grupi qeverisës, nga foltorja e Parlamentit, ose kur nga shërbimi i shtypit shprehin qëndrim negativ ndaj Këshillit Gjyqësor, ndaj anëtarëve të Këshillit, por, më shkatërruese nga të gjitha, është se ata shprehin qëndrim negativ ndaj gjyqtarëve, shumica e të cilëve realisht nuk e meritojnë, vlerësoj se e vetmja gjë që ka mbetur mua është të mbroj integritetin tim personal, paqen dhe qetësinë time dhe të familjes sime, prandaj parashtroj dorëheqje të parevokueshme nga pozita e kryetares së Këshillit Gjyqësor të Republikës së Maqedonisë së Veriut” theksoi Dameva në fjalimin e tij.
Happy
0 %
Sad
0 %
Excited
0 %
Sleepy
0 %
Angry
0 %
Surprise
0 %
0
0
Average Rating