Toshkovski: Numri i të vdekurve në Koçan shkoi në 59, mes tyre edhe një polic, për katër persona është lëshuar urdhër arrest

Pesëdhjetë e nëntë persona kanë humbur jetën nga zjarri që shpërtheu mbrëmë në diskotekën Pulse në Koçan, njoftoi ministri i Brendshëm Pançe Toshkovski në Koçan në deklaratën e tij në ora 12:00, transmeton Portalb.mk.

“Deri në ora 11:30, sa kemi marrë informata ka 59 të vdekur, nga to janë identifikuar 35 nga të vdekurit. 31 nga Koçani dhe 4 nga Shtipi.” tha Toshkovski.

Ai tha se ka 155 persona të lënduar dhe po trajtohen në spitalet në të gjithë vendin. Ka ndërruar jetë edhe një punonjës policie nga Probishtipi, i cili ndodhej në diskotekë.

“Ky punonjës policie duhej të ishte shpallur polici më i mirë për territorin e Probishtipit. Ai ka ndërruar jetë gjatë kontrollit për zbulim të mundshëm të drogës dhe të lehta” tha Toshkovski.

Për katër persona është lëshuar urdhër arrest.

“Ministria e Brendshme në bashkëpunim me Prokurorinë Publike ka lëshuar urdhër-arrest qendror për katër persona të lidhur me zjarrin në diskotekë. Për momentin po sigurohet dokumentacioni nga Ministria e Ekonomisë për diskotekën dhe personat e lidhur me të”, shtoi ministri.

Kur u pyet për të dyshuarit ai nuk komentoi.

“Për momentin nuk mund të jap asnjë detaj të mëtejshëm për katër personat për të cilët është lëshuar një urdhër arresti”, tha ai.

„Sipas informacioneve të para, zjarri shpërtheu si pasojë e shkëndijave nga mjetet piroteknike që ishin përdorur për efektet vizuale. Shkëndijat përfshinë pjesën e tavanit që ishte bërë nga material i lehtë dhe i djegshëm, pas së cilës zjarri u përhap shpejt. Do të kryhet autopsi për çdo person të vdekur, për t’u identifikuar“, tha ministri Toshkovski në një konferencë për media në Koçan në ora 10:00.

Në pyetjen nëse diskoteka kishte leje dhe kush e lejoi që të hapet një diskotekë në një shtëpi me grila në dritare dhe që është ngjitur me shtëpi të tjera, Toshkovski tha se tashmë janë arrestuar disa persona në lidhje me zjarrin dhe do të përcaktohet përgjegjësia.

Një ekip prej pesë prokurorësh ka filluar hetimet.

Ndërkaq ekipet e Kryqit të Kuq po ofrojnë ndihmë për familjarët e të lënduarve që presin para spitaleve.

Happy

0 0 %

Sad

0 0 %

Excited

0 0 %

Sleepy

0 0 %

Angry

0 0 %

Surprise

0 0 %