RMV, për tre muaj – shtatë fëmijë të sëmurë nga tuberkulozi, më i vogli njëvjeçar

March 24, 2024

Read Time:1 Minute, 31 Second

Me rastin e Ditës botërore të tuberkulozit – 24 Marsi, nga Klinika universitare për sëmundje respiratore tek fëmijët në Kozle thonë se ka trend të rritjes së të sëmurëve. Në këtë Klinikë gjendet reparti i vetëm në shtet ku diagnostikohet tuberkulozi.

Doc.dr. Katerina Boshkovska, pediatre dhe pulmologe nga kjo Klinikë thotë se në vitin 2020 ka pasur 12 raste të evidentuara, në vitin 2021 – 5, në vitin 2022 nëntë fëmijë kanë qenë të sëmurë nga kjo sëmundje, ndërsa në vitin 2023 është evidentuar shifër më e lartë prej madje 20 fëmijë të sëmurë.

“Në vitin 2024, gjegjësisht për këto tre muaj të vitit kalendarik, kemi 7 raste. Në të kaluarën, në mesatare kemi pasur nga 10 raste në vit. Maqedonia bën pjesë në vendet me shkallë të ulët të rasteve me tuberkulozin, por në post-kovid vitet, dolën në pah të gjithë sëmundjet, për shkak se gjatë pandemisë nuk diagnostikoheshin mjaftueshëm”, thotë dr. Boshkovska.

“Pacienti më i vogël i cili për momentin është i hospitalizuar tek ne është një vjeç. Përndryshe, simptomat përfshijnë temperaturë të lartë trupore, djersitje gjatë natës, dobësim. Fëmijët qëndrojnë tek ne në spital më së shumti deri në një muaj, ndërsa pastaj mjekimi vazhdon në shtëpi, ndërsa terapia është tabletare”, informoi mjekja.

Sëmundja tek fëmijët mjekohet me terapi anituberkuloz, ndërsa mjekimi zgjat gjashtë muaj. Në muajt e parë, kur sëmundja është në fazën fillestare, pranohen 3 ose katër ilaçe, ndërsa edhe katër muaj mjekohet me dy ilaçe.

Siç shpjegon dr.Boshkovska, ekziston vaksina BSZH e cila u jepet të posalindurve që në maternitete dhe tani për tani është e mirë përfshirja me vaksinim.

Meqë ka fëmijë të sëmurë nga tuberkulozi, kjo do të thotë se ka edhe të rritur, për shkak se të rriturit e bartin sëmundjen tek fëmijët. Sëmundja diagnostikohet përmes analizave të rentgenit, imunologjike dhe mikrobiologjike.