Këshilltari i BDI-së, Mustafi:Komuna e Tetovës keqpërdor me fondet publike

Read Time:1 Minute, 41 Second

Këshilltari komunal, Fitim Mustafi nga BDI-ja e Tetovës, ka akuzuar e Komunës së Tetovës për keqpërdorime me fondet e prokurimit publik për vendosjen e semaforëve në kryqëzimin e bulevardit “Bllagoja Toska” me rrugën “Mehmet Pash Deralla”.

Mustafi ka thënë se pasi u rrezikua jeta e qindrave qytetarëve nga aksidentet thuajse të përditshme, Komuna e Tetoves vendosi që më në fund t’i vendosë semaforët, por edhe kjo po bëhet vetëm për sy e faqe.

Texti integral nga konferenca e sotme për shtyp:

”Tashmë është krijuar një traditë në komunën e Tetovës nga kjo udhëheqësi që çdo punë që tentojnë ta bëjnë e kanë për qëllim interesin personal dhe jo atë të qytetarëve.

I tillë është rasti edhe me semaforët e vendosur te kryqëzimi i rrugës Bllagoja Toska me rrugën “Mehmet Pashë Deralla” afërt spitalit.

Në kohën kur ne si këshilltarë të BDI-së kërkonim që të vendosen semaforë, nga Komuna thonin se ka sinjalistikë dhe se nuk ka nevojë për semaforë.

Pasi u rrezikua jeta e qindrave qytetarëve nga aksidentet thuajse të përditshme, Komuna e Tetoves vendosi që më në fund t’i vendosë semaforët, por edhe kjo po bëhet vetëm për sy e faqe.

Në tenderin e shpallur nga komuna, kërkohet që semaforët dhe shtyllat të jenë të reja. Semaforët gjithashtu duhet të jenë të pajisur me kohëmatës dhe me sustë për këmbësorët.

Por çfarë në të vërtetë u realizua deri tani?

Shyllat e semaforëve janë të vjetra, që datojnë prej para afro 20 viteve. Semaforët nuk kanë kohëmatës e as susta për këmbësorët dhe siç e shihni nuk janë as funksional për momentin, ndërsa nga komuna krekosen se është zgjidhur problemi.

Pyesim kryetarin e komunës se kush nga ju e keqpërdori këtë tender? A do të ketë sanksione ndaj operatorit nëse faji është i tij? A do të zbulohet fajtori dhe a do të ketë përgjegjësi për skandal?

Pasurimi i udhëheqësve të Komunës në kurriz të qytetarëve është vepër penale dhe ata që keqpërdorin fondet e tetovarëve duhet të mbajnë përgjegjësi para organeve të drejtësisë!